Hótel Laugarhóll

Vertu velkominn!

Hótel Laugarhóll er heimilislegt, fjölskyldurekið sveitahótel í Bjarnarfirði á Ströndum, aðeins rúmlega þriggja og hálfrar stunda akstur frá Reykjavík. Farið er um Bröttubrekku og Dali, yfir Gilsfjarðarbrú og Arnkötludal til Hólmavíkur, en þaðan eru aðeins ófarnir um 25 km norður í grænan, vel gróinn og skjólsælan Bjarnarfjörðinn (258 km). Húsið var upphaflega byggt og rekið sem grunnskóli en hefur verið starfrækt sem hótel um árabil. Hótelhaldarar eru hjónin Einar Unnsteinsson og Vigdís Esradóttir en þau störfuðu bæði sem kennarar við skólann á árum áður.

Á Hótel Laugarhóli er góð gistiaðstaða fyrir 32 gesti í 16 tveggja manna herbergjum. Þar af eru 11 með sér baðherbergi, og 5 með handlaug og aðgangi að tveimur salernum og sturtum á gangi framanvið herbergin. Hægt er að koma fyrir auka rúmi í sumum herbergjum.

Veitingastaður með útsýni yfir fjörðinn er í notalegum borðsal þar sem hægt er að panta af matseðli ljúffenga rétti úr héraði eða heimilislegan íslenskan mat. Gestir hafa einnig aðgang að hlýlegri setustofu með bókum, spilum, sjónvarpi og nettengingu. Stór, viðarklæddur samkomusalur/íþróttasalur með rúmgóðu sviði er inn af gestamóttöku, þar sem leika má körfubolta og borðtennis, eða halda fundi, tónleika, ráðstefnur, námskeið og veislur af ýmsu tagi.

Við hótelið er ylvolg 25 metra sundlaug, Gvendarlaug hins góða, með náttúrulegu heitu vatni úr fjallshlíðinni (32°C) og við hlið hennar náttúrulegur heitur pottur (uppspretta 42°C). Alveg einstök aðstaða til stjörnu- og norðurljósaskoðunar, - enda tekið á móti ferðalöngum á Hótel Laugarhóli allan ársins hring.

Hótel Laugarhóll er friðsæll og þægilegur dvalarstaður og þaðan má halda í margar skemmtilegar dagsferðir um nágrannabyggðarlög, svo sem yfir í Kaldalón í Djúpi og að Drangajökli, í yfirgefna síldaverksmiðju í Djúpuvík og þaðan í Krossneslaug í Norðurfirði, siglingu, lundaskoðun og sjóstöng í Grímsey á Steingrímsfirði eða bara notalegar göngu- og fuglaskoðunarferðir um fjörðinn. Galdrasafnið á Hólmavík og Kotbýli kuklarans á Klúku vekja einnig verðskuldaða athygli, sem og Gvendarlaug hin forna, blessuð af biskupnum Guðmundi góða.

Margvísleg afþreying er innan seilingar; silungsveiði, sjóstöng, söfn, hestaferðir, gönguleiðir, fjölbreytt og víða stórbrotin náttúra og ómótstæðilegar rekafjörur, eitt helsta tákn Strandasýslu.